Royala Brekkustova

So er Ólavsøkan farin aftur um bak, og gerandisdagurin er við at fáa fastatøkur á okkum aftur. Góð var hon, men onki kemur av ongum, so eisini hjá okkum skuldi nakað av stákan til.

Ein partur av stákanini var at fáa bilbukt við einum pakka ið Drós sendi heim nú hon var liðug á Kunsthøjskolen í Holbæk. Í hesum pakka vóru bæði størri og smærri málningar. Serliga tann eini var í størra lagi at hava inni í Brekkustovu, og tí kom hugskotið so spakuliga, – eisini fyri at fáa ruddað og prýtt um til ólavsøku – um tað ikki hevði riggað at hongt hann uttan á húsunum.

Tað var roynt við góðum úrsliti. Trupulleikin var bara, at vit eru noydd at gera ein framsýningarkassa fyrst, og hesin kassin gjørdist so ið hvussu so er ólavsøkutrøll.

Nú fer kanska onkur at halda, at vit í Brekkustovu ikki eru so kongatrúgv at vit vilja hava slíkar málningar – til tað er at siga, at vit eru sera kongatrúgv, so trúgv, at vit enntá læna okkara føroysku klæðir til drotningina, tá hon kemur á óvæntaða vitjan á Doktaragrund. Sjálvt kýsan fekk hon frá okkum…

Sí Drotningavitjanina á Doktaragrund 2005 við Annfinn Heinesen og Allan Dalsgarð – og Høgna Hoydal sum statisti. Ingun í Skrivarastovu gjørdi filmin.

(NB, filmurin liggur á Facebook – neyðugt er at rita inn)

Viðmerkingar eru vælkomnar ;)

This site uses Akismet to reduce spam. Learn how your comment data is processed.